«Хүхэ субад-2022» (Синяя жемчужина) гэһэн мүльһэнэй наадан жэл бүхэн үнгэргэгдэдэг юм. Байгша оной мартын 3-4-эй үдэрнүүдтэ Монгол ороной Хүбсэгэл далай дээрэ болохонь.
Энээн тухай Хүбсэгэл аймагай захиргаан дуулгана.
Монгол ороной оршон тойрониие хамгаалгын болон аяншалгын яаманай үүсхэлээр үнгэргэгдэдэг тус наадан үбэлэй сагта аяншалга хүгжөөхэ хэрэгтэ туһа үзүүлнэ.
Хоёр үдэрэй туршада айлшад үндэһэн арадай наадануудта хабаадалсаха, морин шаргаар гүйлгэлдэхэ, конькигаар халтирха, гэлигэр мүльһэн дээрэ аргамжа татажа эрхимүүдээ элирүүлхэ. Хаана-яанаһаа бууһан айлшадта Монголой зүжэгшэд арадайнгаа дуунуудые хангюурдаха, үндэһэн хубсаһанайнгаа һайханиие үзүүлхэ.
COVID-19 үбшэнэй тарахада, ехээр доройтоһон аяншалгын һалбари дахинаа һэргээхэ, хүгжөөхэ гэжэ Монголой Засагай газар түсэблэнэ. Энэ һарын 14-дэ аха дүү Монгол оромнай хилэеэ нээжэ, айлшадые угтажа эхилээ. Айлшад бултадаа һэргылэмжын тарилгатай байха ёһотой бшуу. Эрилтэнүүдыень дүүргэжэ шадаха байбал, хүршэ Хүбсэгэлэй мүльһэнэй нааданда манайшье нютагайхидай айлшалхадань яалай.